Eietydse kleurkuns - Meer as 50 knoopkleurprojekte vir serpe, rokke, T-hemde en dekor (Paperback)

Lapkleurwerk om interessante patrone en kleure te skep, is 'n antieke kuns wat eeue lank regdeur die wereld beoefen is en die afgelope tyd weer met hernude entoesiasme aangepak word. Met hierdie titel ontsluit kleurkunsdeskundige Melanie Brummer die ongelooflike moontlikhede van gekleurde lap vir almal met eenvoudige tegnieke, huishoudelike toerusting en klaargemaakte klere. Sy neem die knoopkleurtegniek van die Hippie-era tot in die 21ste eeu en wys jou hoe om T-hemde te kleur, ou klere met kleur te herwin, die mooiste syserpe te maak of om kleurryke modestellings te maak met klere wat met haar beproefde kleurwerktegnieke versier is. Met meer as 50 projekte om uit te kies en met die vereiste vaardigheidsvlak by almal aangedui, is daar meer as genoeg vir die beginner en die handwerker wat tegnies gevorderd is. Elke projek word verduidelik aan die hand van duidelike stap-vir-stap aanwysings en foto's wat jou wys hoe om 'n groot verskeidenheid wonderlike kleureffekte te skep terwyl pragtige kleurfoto's die voltooide items illustreer. Die titel verduidelik ook die chemiese prosesse wat by kleurwerk betrokke is en lei jou deur die tegniese aspekte van kleur en kleurwerk. Dit sal jou help om jou lewe van 'n vaal blou baadjie in 'n Josefskleed van reenboogkleure te omskep. Begin sommer nou eksperimenteer en leef jou uit in jou eie kleure.